1 Macc 5

Isaraeleme dindi tara tara kaware wiaru baba wai binigo ogo

1 Wali agali dindi kawareni bu hearu ti hale halu hearia Yuda wali agalime Anduane Homogonaga anda bo gialo wahayago lone hongohe biadai bialu Anduane Homogonaga lomabu delaga dabu biago lone biadai bialu mo bayale ho nga layago hale howa ti mogolo hene. 2 Ani howa Isaraele wali agali maru ti baba haga ti daluha hearu bibahende bo wahai holene manda bini. Ani buwa tigua Isaraele wali agali hearu mbira bo wahaga bialu hene.

3 Iso hameigini Idumia dindiha bu hearume Isaraele henge nami tigua hapai hayagonaga ai Yudasahanda ti baba wai bini. Ibugua Agarabadene dindi wiagoria wai bialu ibugua ti bope halu ibu wayali howa tinaga mbirale wiaru mo yai halu pene. 4 Ani bialu mana ko abale Baiana hameiginirume binigo Yudasa ibu mitangi bu dai bini. Wali agali uruni tigua Isaraele wali agali mo ko halu genda tara tara deware mo mialu haga hene. Tigua harigani bira do howa wali agali harigani bolangua haga biaru minu balu mo ko haga biaga hene. 5 Ani heago hondowa Yudasahanda wali agali bibahende Baiana tanoha hearu mamage haga tano pabe neneni anda daliga bu heagoha agali mamage hearu heba ho hagira bu yaanda hene. Bibahendeore homelo bo wahaiore hole lalu gi dolalu bi lene. Ani lalu puwa anda mamage haga daligaore bu helene hearu heba wali agali anda tamuha bini hearu bo heda hai hene. 6 Ani bialu mani Yudasa halu ibunaga ami agali biarume puwa Amono wali agali baba wai bule pene. Amono tinaga ami agali hongohe dewaore howa Timodi ibugua haru howa handaya ho haga hene. 7 Ani agali uruni beba Yudasa ibugua wai biaabo halu howa ibugua ti bope hai hene. 8 Ibugua wai buwa Yase tano karu lalu dindi emene wiapara para biarubi karu lalu bini. Ani biai halu Yudia dai bini.

9 Ani biagola dindi hobane mbira mini Gileada agali buhearume Isaraele wali agali tinaga dindiha bu karu baba wai bialu bibahende bo wahai hene. Ani biyagola Isaraele wali agali ti Dadema dindiha ha do holene anda hongohe heagoha pu hene. 10 Ani pu howa tigua Yudasa halu ibu hamene biaruhondo beba gilibu pelalu howa lalu, Wali agali Anduane Homogo mitangi nahaga oali bu karu tigua Timodinaga ami agaliru baba ho biamaga haya. Ani biya handala ina ibida puwa anda hongohe ogoha ibu kema. Anigo agali ko uruni tigua anda hongohe ogonibi giala holebu wahai holebirago 12 ayu ogoni ina biamogo bule abale ibabe. Ina aria dewaore homai haya. 13 Ina damene dewaore tano mini Tobo wiagoria heneru bo wahai haya. Ani bialu wali waneiginiru garabaya helalu tinaga muni dabudabu wiaru mo page biai haya. Wali agali ogoniha henego bibahende daga daosini mbira (1,000) agima kaware dege henego homai haya, lalu bi lo wia hene.

14 Yudasa ibu beba ogoni wene daga lalu heagola agali mbira Galiliha howa beba mende yalu ibini. Agali mani ibiyadaruni tigua dara ho kago walia halu biagadagua tinaga agaru budabaga bu yalu ibini. 15 Ani ibuwa tigua lalu, Agali bibahendeore tano tebira Tolemesebi Taiabi Saidonobi heba agali bibahendeore Galilinaga abene uyurahayagi haga hearume tinaga ami agali dewaore mo tago bialu ina bibahendeore mbiraorebi mbira pora bialu napelo bo wahaiore hole ibira laya, lene.

16 Yudasa halu ibunaga wali agalirume bi ogoni hale howa ainde ti damene waitigi giha howa homai holobadago biamogo agua bimabe lole ti mo ngoai hene. 17 Ani mo ngoai howa Yudasa ibu hamene Saimonohondo lalu, Ina damene Galiliha haruago biamogo bule pelo agali maru abale dababe. Ai i̱ Yonadana iyame Gileada porabago, lene. 18 Ani bialu Yudasahanda ami agali maru hearu tigua Yudiaha baya hangu handaya ho halimu lene. Ani lowa ibugua agali kirali wali agali Yudiani hayadaru handaya ho helonaga Segaraia igini Asariala Yosebela dabo helene. 19 Ibugua libuhondo lamialu lalu, Wali agali ogoria karu libugua handaya ho halibulo helarogoni. Waitigi maru karu baba wai bulumini nabilibu. Ina dai buluma̱ya hondo halibu, lene. 20 Ani lalu ami agali daosini tebira (3,000) bibahende Saimono heba Galili pole pene. Ani piyagola ami agali daosini haliria (8000) bibahende Yudasa heba Gileada dindi pole pene.

21 Saimono ibugua puwa Galiliha wali agali Anduane Homogo manda nabi hearu baba wai bialu bibahende bo podahana hai hene. 22 Ibugua bo padama pu dege bialu Tolomese tano tagira pialu daosini tebira (3,000) agima homene bo wahai hene. Ani bialu ami agali bo wahayarunaga danda timu yári tara wai pialu karulaga ale karulo haabore wiaru ti mo yai hene. 23 Ani bialu Yuda wali agali Galiliha bu hearubi Arabadaha hearubi bibahendeore mo mogo biai halu ti one waneiginibi tinaga dabudabu wiarubi heba yai halu Yudia dindiha dai bini. Ani biyagola wali agali uruni ti turu timbuniore hai hene.

24 Ogoni dege Yudasa Magabeusu halu ibu hamene Yonadana halu ami agali biaru Iba Yodana domalu horo tebira pialu dindi ko wali agali nahaga wiagoha pene. 25 Puwa tigua Nabadia hemeigini bu hearu ngola hayagola uruni tigua ogolabohondo turu timbuni howa mbirale bibahende Yuda wali agali Gileada dindiha hearunaga te baya hangu lamiai hene. ^{▼▼(5.25)Nabadia hameigini uruni agali hongoheore Iba Yodana doma ederaha ni tagira ibiragohayagi bamba Idomo hameigini dindi winigoria hene. Tinaga kini henerume tano hongohe bayaleru ogoniha bu helaga bini. Kini Aredasa ogoni aria mbira henegonaga te Polohanda 2 Korindi 11.32 howa Polohanda te ledago ogoni aria henegohondo leda.} 26 Tigua lalu, Yuda wali agali dindi ogoniha tano hongohe timbuni Bosora tanohabi Boso tanohabi Alema tanohabi Kasabo tanohabi Magede tanohabi Kanaimi tanohabi garabaya hai heleda. 27 Ani bialu Yuda maru Gileada dindiha tano emene ngaruha garabaya hai heleda, lalu lamini. Ani bialu Yuda wali agali lenego bibahende horo mbira hanguni bo wahai halu tinaga anda hongohe karu yawi dege bo gialo wahai hole tagira polebira, lalu lamini.

28 Ani layago hale howa Yudasa halu ibunaga ami agali biaru tigua dindi ko iba dalu naibi dindi ko wiagoha tano Bosora wiagoha pole pene. Pialu tigua tano ogoniha hearu baba wai bialu wali agali tano ogoniha haga bu hearu bo wahai howa tano bo heda halu wali agalinaga dabudabu tara tara wiaru ti mo yai halu bini. 29 Ani ti mbiraga hangu puabo halu tano hongohe mini Dadema wiaga kawareha Isaraele wali agali anda bu heagoria anda pene. 30 Egabi layagola Yudasa halu ibunaga ami agali biaru tigua handalu hemiria ami agali dewaoreme tanoha anda hongohe heago bo gialaga laga bialu hearia hendene. Tigua wai bulene masini tara tarabi wai pabe irigi holenaga egageriabi mo yalu íbu howa wai bulenaga wai pabe hongohe heago bo giala hole biyago de hendene. 31 Yudasa ibugua mbirale uruni biyago de hondo howa hale halu hearia tanoha wali agalime ga̱ hongo howa ladagadaga bialu pilipe layuagola ai wai biyada lo manda bini. 32 Ani hale howa ibunaga ami agali bu hearuhondo lamialu, Ayu ina hameneru biamogo bialu mo wulenaga wai hongo howa bimi̱ya, lene.

33 Ibugua ibunaga ami agali biaru halu tebira mo tale bialu waitigi erembira wiagohayagi wai bia aribia hene. Yuda tigua nai hongo howaore bialu waitigi bope howa tigua Anduane Homogohondo bi hongo howa lene. 34 Ai Timodinaga ami biaru tigua Yudasa Magabeusu ibiyago hondowa ti beregedalu ibida piai hene. Horo ogoningi Yudasa halu ibunaga ami agali biarume waitigi ami agali daosini dege halira (8,000) bibahende geme hengedai howa bogai hene.

35 Ani bialu Yudasa ibugua Alema tanoha wai bule pene. Puwa ibugua wai bialu agali tano ogoniha haga hearu bo wahai hene. Wali agalinaga dabudabu wiaru ti mo yai halu tano bo heda hene. 36 Ani bialu Kasabo tano bo podalu Magede tanobi Boso tanobi Gileada dindiha tano maru wiarubi bo heda hai hene.

37 Ani biyagola maha Timodihanda ami agali maru hearu lone mo ngoai howa Labono tanola hengene tubari iba gana emene wiago kawareni balai anda bialu hene. 38 Ani bialu heagola Yudasa ibunaga ami agali hearu aria marume waitiginaga balai anda bu heagoha baya hangu hondo wu pudaba lene. Ani laya handala marume hondo pialu dai buwa tigua lalu, Agali Anduane Homogo mitangi nahaga dindi ogoniha hearu bibahende tidiyu pialu Timodinaga ami agaliha hatago howa agali dewaore ka. 39 Timodihanda ami agali maru Arebia dindiha bu hearu ibu biamogo bule wai ibuha anda ibilo munime yolo bialu ibunaga ami agali dewaore hea. Ani howa tigua ina baba wai bule iba doma ederayagi balai anda buwa manda manda bu hea, lene. Ani laya handala Yudasa ibugua wai bule pene.

40 Yudasa halu ibunaga ami agali biaru iba ange wiago kaware ibiyagola Timodihanda ibunaga ami agali haru halu bamba haga bu hearuhondo lamialu lalu, Yudasahanda iba domalu ina kemagoha ibu ala ibiyagua nde iname ibu babe nahe ibugua ina bope holebira. 41 Anigo ibugua iba domalu naibi iba angeni hondo hayagua nde iname iba domalu puwa wai bialu ina ti bope halu wayali holeberema, lene. 42 Ai Yudasa halu ibunaga ami agali biaru bia ange wiagoria íbu howa ibunaga ami agali haru haga bu hearu iba angeni ibu hai helowa tihondo lamialu lalu, Ami agali tí bibahendeore wai pora biai halimu. Mbira hangubi hadai nabilimu, lalu lamini. 43 Ani lalu ai Yudasa ibuni wai pole bamba halu ibaha pora bialu piyagola ami agali bibahende piai hene. Ani piyagola ami agali Anduane Homogo mitangi nahaga bu hearu ibida pugupugu biai hene. Danda timu timbuni yiaru wahai halu ibida puwa Kanaimi tanoha bi pupu wiaga gime wabini wiagonaga anda timbuni heagoha ibida pialu birado hai hene. 44 Ani biyagola Yudasa halu ibunaga ami agali biarume haruru talima puwa anda timbuni ogoni heba wali agali anda ogoniha birado hearu bibahende bo heda hai hene. Yudasahanda Kanaimi tano bo podahana hayagola wali agali tano ogoniha hearume mo ko holene mbira Yudasahondo lone bibe nahe hene.

45 Ani bialu Yudasahanda Isaraele wali agali Gileada dindiha hearu bibahende mo mogo biai halu Yuda dindiha haru dai bini. Ti piyagola daga lamibe naheore dewaore tidiyu pene. Wali agali tara tarabi wali waneiginibi tinaga dabudabu wiarubi heba piai hene. 46 Ti pialu tano timbuni mbira mini Eberono ege pabe hongohe bu mabubi wiagoria pialu hemiria wali agali tano ogoniha hearume waipabe panga hongo howa payatagi hene. Ti hariga ogonidagua pialu tano ngago pu balalu pubagi halu polene henge nawiore hariga mbiraore hangu tano tamuha bolaangua halu polene mbiraore wini. 47 Anigo wali agali tano ogoniha haga bu hearume Isaraele wali agali bolangua halu pelo henge nami tigua ege to̱le̱ timbuni wiaru muwa pabe panga hongo howa payatagi hene. 48 Anidagua biyagola Yudasa ibugua bi bayaleore lo pelalu lalu, Ina tí daluha hariga dege bolangua halu inane dalu pole poloma̱ya henge ngidaba. Iname tíha ko mbira bulene manda nabi bame hariga dege bolangua halu poleberema, lene. Ani layago Yudasanaga bi hale nahe tigua panga payaho haabo hene.

49 Anidagua biyagola Yudasahanda ibunaga wali agali ogoriani hondo hadaba lowa 50 ami agali biaru tigua danda timurubi wai biaganeale wiaru mo manda manda biai hene. Ani bialu anda puwa wai mbira horombebi biaho wialu tigua bo podahana halu tano ti karulene. 51 Yudasa ibugua agali bibahende bo wahai halu tano ogoni bo gialahole biai halu tanoha wali agalinaga mbirale bayale wiaru bibahende mo hilo yai halu bini. Ani bialu Yudasa halu ibunaga ami agali biaru agali tinime bo wahene wiaru tinginini ge haga bialu pene. 52 Pialu iba Yodana domaede halu dindi tigabi mbira Bedesana tano wiago abene mbirayagi tagira pene. 53 Ani pialu howa Yudasa ibugua agali maru hariga pole manga halu maha ibiyaru bime mo hongo haga bialu bime wali agalinaga bu miniha mo hongo hama dege ibalu Yuda dindiha anda ibini. 54 Tigua wai biyagohabi hariganibi mo ko halubi waiha homabi nabi dege haabo halu dai biyagonaga turu timbuni hama Saiono nene irigi halu Ngode Datagaliwabehondo turu howa ka̱i̱ lama pialu loma irani dai holene lomaru bu delole pene.

55 Ai Yudasa Saimonola Gileada dindiha pu heagola libu hamene heagome Galili dindiha Tolemese tano wiagoria wai bialu hene. 56 Ani bialu heagola Yudanaga ami haru haga Yosebela Asariala libu hale halu hebiria tebirali hamenema biarume wai bialu tigua bo podahana haga bima pora layago te hale hene. 57 Ani hale howa libugua lalu, Iyame nde wali agali Anduane Homogo manda nabiaga wali agali kaware karu baba wai bialu wayali howa iyabi mini lene dege habiya wai bu mba, lene. 58 Ani lalu libugua ami agali bu hearu haru haru halu Yabane tano wiagoha wai bule pene. 59 Gogiasahanda tano wahalu ogolabo baba harigani ngola howa wai bule pene. 60 Puwa Gogiasa halu ibunaga ami agali biarume wai bialu Yosebe Asariala aria biaru bama talima pialu Yuda dindiha taliairi hene. Horo ogoningi dege Isaraele ami agali daosini kira agima (2,000) bo wahai hene. 61 Ami agali haru hagane haguane kirali biago labome Yudasa halu ibu hamenerunaga bi hale nahe libuninaga mini yaraga holene hame lo hebiria ani homai hene. 62 Ani bialu libu agali maru Ngode Datagaliwabe ibunime Isaraele wali agali mo wialu haru dai bilo dabo helene hayadaru aria ndo heagome bini.

63 Anigo Yudasa Magabeusu halu ibu hameneru ti dege Isaraele wali agalinaga denibi wali agali tara tara bu hearu denibi mini lene daligaore hene. Wali agali bibahendeme biabe timbuni tigua biyaru hale hai ho howa 64 tininaga dengui handalu tinaga mini yaraga haga bialu haga hene.

65 Mani howa Yudasa halu ibu hamene biaru heba dindi abene unurahayagi Iso hameigini palearu baba wai bule pene. Yudasahanda puwa Heberono tano wiagoria wai bialu tano emene emene wiaruhabi wai biai hene. Wai pabe hongohe biaru bo gialo wahai halu mamageali handa amunana bu haga anda daliga bima irigi hene bu hearu bo heda hai halu bini. 66 Ani bialu ibunaga wali wali agali haru halu Pilidia dindi wiadagua puabo halu Maresa tano wiago hanuni bolangua hene. 67 Ogoningi agaliloma binigo mo miaga bu hearu tigua tinaga miniha emene mini ko wu howa tibi nde mini lene pari wayali dege holenaga wai pene. Ani pialu hearia waitigime tiha bogo hana hai hene. 68 Ai Yudasa halu ibu damene biaru ti beregedalu Pilidia dindiha Asadodo tano wiagohayagi puabo hene. Ani puwa dindi ogoniha dama mitangi bialu bi pupu wiaga gime wabini wiarunaga lomabu delaga dabu hearu bo gialo wahai halu uruninaga bigiya wiaru mo delaga bini. Ani ogoniha wiaru bo gialo payabu wahai halu Yuda dindi dai bini.